Stand United yamnyatia mchezaji huyu wa Yanga.

Klabu ya Stand United ‘Wapiga debe’ wa Shinyanga imethibitisha kupitia mkurugenzi wake wa ufundi

kuwa klabu hiyo ipo kwenye mazungumzo ya kumnasa kiungo wa Yanga ambaye kwa muda mrefu amekosa nafasi ya kudumu ndani ya kikosi cha mabingwa hao wa msimu uliopita.

 

Mkurugenzi wa benhi la ufundi la Stand United Muhibu Kanu amesema, timu yao imekaribia kumpata Hassan Dilunga kutoka Yanga ili ajiunge na Stand United kwa ajili ya msimu ujao.

“Tulizungumza tangu mwanzoni tulikuwa na mpango wa kumfuatilia mchezaji huyu, lakini nafikiri tumeshakubaliana na kamati ya utendaji na mwenyekiti atakuja kulizungumzia jambo hilo lakini ni kweli tunamazungumzo na Yanga kuhusu kumsajili Dilunga”, Kanu amethibitisha.

“Mwenyekiti wangu yupo hapo mjini (Dar es Salaam) yeye ndio analishughulikia jambo hili na alipewa jukumu hilo na kamati ya utendaji kuhakikisha kwamba analimaliza”, ameeleza.

“Sisi kwa upande wetu kuna wachezaji ambao tulikuwa tumewapendekeza wanaotoka kwenye timu nyingine lakini pia wengine wapo ambao wanatoka kwenye timu yetu ya vijana ambao tutawapandisha kuja juu”, amesema.

“Kwahiyo nafikiri mpaka tarehe ya mwisho ya usajili itakapotangazwa tutawatangazia watanzania nani ambae ameingia na nani ambae ametoka na ni wangapi ambao tumewapandisha kutoka kwenye kikosi cha vijana”, ameongeza.

Lakini katika hatua nyingine Kanu amekanusha taarifa zilizoanza kuzagaa kwamba timu hiyo inampango wa kumsajili beki wa kulia wa Simba Nassoro Masoud ‘Cholo’ akisema uvumi huo hauna ukweli ndani yake na wala jina la Cholo halipo kwenye mapendekezo ya wachezaji wanaotaka kuwasajili kwa ajili ya msimu ujao huku akisisitiza kuwa, Cholo hana nafasi kwenye kikosi hicho.